12 декабрь БДУ-ның Сибай институтында күренекле прозаик, драматург, Башҡортостан Республикаһының С. Юлаев исемендәге премия лауреаты Т.Х. Ғарипова менән осрашыу үтте. Осрашыу әҙибәнең юбилей турнэһы сиктәрендә ойошторолдо.
Сара башында Сибай институтының социаль эштәр буйынса директор урынбаҫары, п.ф.к., доцент С.Н. Чернов, Таңсулпан Хисбулла ҡыҙын юбилейы уңайынан ҡотлап, уға институт администрацияһы, уҡытыусылар һәм студенттар исеменән бүләк тапшырҙы. Студенттар яҙыусының ижадын ҙур ҡыҙыҡһыныу менән өйрәнә һәм улар яратып уҡыған “Бөйрәкәй” роман-эпопеяһының төп героиняһы Мәҙинәнең атта сабып барған һүрәтен ташта һынландырған ине.
Осрашыу артабан Т. Ғарипованың Сибай ҡалаһына бәйле хәтирәләренә, иҫтәлекле ваҡиғаларына байҡау яһау менән дауам итте. Студенттар яҙыусының тормош юлы һәм ижады буйынса һорауҙар бирҙе. Улар айырым әҫәрҙәрҙең яҙылыу тарихы, яҙмышы менән ҡыҙыҡһынды. Хәҙерге башҡорт әҙәбиәтенең үҫеше, тәнҡит торошо тураһында һорауҙар бирҙе. Осрашыу барышында Т. Ғарипова әҫәрҙәре буйынса ҡуйылған спектаклдәрҙән өҙөктәр ҡаралды һәм анализланды. Уларҙан сығып, хәҙерге замандың актуаль проблемалары тураһында фекер алышыу үтте. Йәштәр, әҙибәнең “Бәхеткә ҡасҡандар” спектаклен ҡарағас, хәҙерге заманда ҡырҡыу торған проблемаларҙың береһе – ғаиләлә, йәмғиәттә ҡатын-ҡыҙҙың һәм ир-егеттең урынын асыҡларға тырышты. Уларҙың фәлсәфәүи фекерҙәре бөгөнгө заман проблемаларына бәйләнде: ир-егеттәрҙең күбеһе ғаиләһен аҫрау ихтыяжынан Себер тарафтарында булғанда нисек ир балаларға атай тәрбиәһе бирергә, нисек ысын ир-егет итеп үҫтерергә. Студенттар ошо һәм башҡа актуаль проблемаларғы ҡарата яҙыусының фекере, ҡарашы менән ҡыҙыҡһынды. Шулай уҡ Т. Ғарипованың тормошсан әҫәрҙәре буйынса фильмдар төшөү яҡшы булыр ине, тигән теләктәрен дә әйтте. Студенттарға айырыуса әҙибәнең халыҡ ижады ынйыларын – эпостарҙы яңы форматта, йәғни фантасмогория, мюзикл формаһында, тәҡдим итеүе оҡшаны.
Бынан тыш осрашыуҙа Т. Ғарипова еткәселегендә Сибай телевидениеһында эш башлаған, хәҙерге көндә институтта эшләгән уҡытыусылар сығыш яһаны. Улар Таңсулпан Хисбулла ҡыҙына кәңәштәре һәм ярҙамы өсөн ҙур рәхмәттәрен еткерҙе. Сараны Сибай институтының “Ете ырыу” халыҡ бейеүҙәре ансамбле башҡарыуында “Башҡорт сувериры” бейеүе, Динара Йәрмөхәмәтова башҡарыуында “Ҡыңғырау сәскә” бейеүе биҙәне. Зөбәйҙә Ҡоломбәтова башҡарыуында “Йәшлек тауы”, педагогика факультеты егеттәре башҡарыуында “Салауат”, Әлфиә Йәнбәкова менән Илүзә Йәнғолова башҡарыуында Т. Ғарипова һүҙҙәренә яҙылған “Һаҡмар һылыуы” йырҙары яңғыраны. Педагогика факультетының башҡорт һәм рус филологияһы кафедраһы эргәһендә эшләп килгән “Инеш” ижад түңәрәгенең ағзалары юбилярға арналған шиғырҙарын уҡыны.
Т.Х. Ғарипова менән осрашыу бик фәһемле һәм йөкмәткеле булды. Яҡташыбыҙға ныҡлы сәләмәтлек, ғаилә именлеге, уңыштар, ҡаҡшамаҫ рух һәм ижад ҡомарының һүрелмәүен теләйбеҙ!
Г.Х. Сәмерханова,
Сибай институтының башҡорт һәм рус филологияһы кафедраһы доценты